Подготовка за во училиште

Пренесете му го на детето позитивниот став кон училиштето.
Немојте да имате преголеми очекувања и барања.
Подгответе го заедно местото каде ќе учи и ќе се подготвува за во училиште.
Помогнете му на детето да ја прифати учителката, новите обврски и начин на живот.
Изразете доверба во вашето дете, во училиштето и учителкатата.
Покажете интерес за секое случување во училиштето.
Не заборавајте да посветите внимание на детските чувства, доживувања и размислувања.
Научете го детето кој е најсигурниот пат до училиште.
Дајте му можност на вашето дете да се обиде да направи нешто ново, охрабрете го, поттикнете го и пофалете го.
Негувајте ги културно-хигиенските навики на детето.
На секое дете му се потребни доследност и правила. Поставете граници на однесување, но и слобода на избор.
Вклучете го детето во решавање на проблемите и во донесување на одлуки во работите кои се однесуваат на неговиот живот.
Бидете модел на однесување на вашето дете.
Разговарајте постојано со вашето дете.
Бидете поддршка кога детето ги изразува своите емоции.
Поддржете го детето во своите верувања.
Не го оптеретувајте детето со вашите преголеми очекувања; нагласете го трудот, а не успехот.
Поттикнувајте ја самостојноста кај детето.
Задолжувајте го детето со ситни задачи (учество во домашни активности).
Поттикнувајте го детето да го заврши веќе започнатото.
Поддржувајте ја и развивајте ја заинтересираноста на детето и иницијативноста за барање одговор.
Поттикнувајте соработка со другите.

Патот до среќата е да ги сакате, да им помагате и да ги почитувате децата од најраното детство па се до нивната зрелост.

Толеранцијата во процесот на воспитување на децата

“Сличностите не поврзуваат, а разликите збогатуваат”

Толеранцијата е нешто што се учи и што е битна алка во процесот на воспитување на децата. Важно е уште на најмала возраст да ги научиме децата како да го прифатат и почитуваат богатството од различности, култура, обичаи, навики, начин на изразување и воспитување. Толеранцијата е лична особина која се дефинира како почитување на туѓите идеи, верувања, мислења и постапки.
Со заедничко делување во семејниот дом во кој детето се развива и образува се градат ставови и вредности кои ја промовираат љубовта, солидарноста, еднаквоста и меѓусебното прифаќање.
– Игри на запознавање и комуникација
Децата најдобро учат и памтат од она што го гледаат. Поттикнете го детето да се запознава со врсниците и да биде проактивно.
– Читајте му приказни за толеранција
Прочитајте му ја на детето приказната за “Грдото пајче” на кое сите му се потсмевале затоа што е различно од другите. Оваа приказна на најдобар начин ја прикажува дискриминацијата и чувството на тага. Наведете го детето да ги каже емоциите на пајчето од почеток до крај и нагласете ја промената која ја доживеало.
– Цртање различности
Дајте му насока на детето да нацрта виножито на сличности и разлики, така што секоја боја нека претставува одредена личност која детето ја познава, потоа да каже што сака кај таа личност, а што сака кај себе.
– Покажете му двосмислени слики
Зависно од начинот на гледање на двосмислените слики може да се видат две различни работи. Покажете му ги на детето и прашајте го што гледа.Детето ќе согледа дека не мора сите секогаш да ги гледаме истите работи.
– Проширете ги детските видици со патувања
Патувањата се најдобар начин на учење за себе и другите на било која возраст, посебно во детството. Разговарајте и за други земји и различни култури, обичаи, навики.
– Помогнете на некое здружение или установа за децата со потешкотии во развојот
Вашето дете на овој начин ќе увиди дека може да игра и со деца кои на прв поглед изгледаат различни.
– Учење странски јазик
Учењето странски јазик уште од најмала возраст е еден од начините на кој детето најдобро и најлесно ќе сфати дека има различни култури на народ кои користат друг јазик на комуникација.
– Бидете пример
Децата учат според модел, го имитираат однесувањето на родителите. Затоа избегнувајте да се шегувате невкусно во присуство на детето, не зборувајте лошо за другите и бидете вистински пример за толеранција. Да направиме средина каде што ќе се негува тоа што е позитивно.
– Покажете толеранција во семејството
Учете го детето на емпатија.
– Сепак не треба СЕ да се толерира
Колку и да е важна толеранцијата, детето мора да знае дека постојат и граници. Детето треба да учи како да толерира различни нации, раси, пол, но мора да знае и дека навредите, понижувањето и сл. никако не смее да се толерираат.
“За децата да се чувствувааат сигурно и опуштено во различни животни околности важно е да се развива и негува отвореност кон прифаќање на различностите”.

Почитувајте го куќниот ред и протоколите на градинката

Почитувани родители,
Ве молиме почитувајте го куќниот ред и протоколите на градинката.
Градинката е отворена од 06:00 до 18:00часот.
Детето носете го во градинка најдоцна до 08:30 часот.
Заради безбедност на децата, вратите треба да бидат секогаш затворени.
Вашето дете треба да има ранче со потребна облека за пресоблекување.
Веднаш на влезот облечете му на детето обувки за во градинка.
Почитувајте го рокот за плаќање на услугата.
Не носете играчки од дома.
За информација контактирајте ги вработените од вашата група.
Покажувајте кооперативност и толеранција.
Вашата комуникација со другите родители, деца и вработени претставува модел на учење за однесување на вашето дете.
Позитивниот контакт иинтеракција ја зголемува довербата и сигурноста кај вашето дете.
Информирајте го воспитувачот за промените во семејството поврзани со детето кои би можеле да влијаатврз однесувањето на детето во градинка.
Присуствувајте на родителските средби.
Доколку имате потреба од подолготрајни конструктивни разговори за вашето дете со воспитно-згрижувачкиот кадар (индивидуални средби) ве молиме истите да се одвиваат после 12:30 часот.

Адаптација на дете

За секое семејство тргнувањето во градинка претставува голема промена во динамиката, навиките и во емотивна смисла во начинот на живеење. Овој премин од еден во друг животен период е многу важен настан за сите нас и потребно е заеднички и трпеливо да го спроведеме. При тргнување на детето во градинка треба најпрво да се подготви детето, но и останатите членови на семејството. Очекувањата на родителите за овој период на адаптација се различни. Едни сметаат дека доколку детето сака деца и друштво полесно ќе го преброди овој период, а пак други сметаат дека тешко ќе се прилагоди и одвои, и се со прекумерен страв, вознемиреност и безброј дилеми.

– Од што најмногу зависи каква ќе биде адаптацијата:
Од тоа колку детето има искуство во одвојување од родителите
Од индивидуалните особини на детето, степенот на развој и здравствената состојба
Од редовноста во градинка во периодот на адаптација – нередовноста ја продолжува адаптацијата
Од возраста на детето

Во првите денови пожелно е вие да го носите детето. Детето најлесно прифаќа кога чувствува сигурност од присуство на родител.

– Во периодот на адаптација:
Запознајте го детето со воспитниот и згрижувачкиот кадар. Постигнете добра комуникација со учителките.
Имајте позитивен ставкон градинката. Пожелно е сите членови на семејството да бидат согласни во ставот дека детето треба да оди во градинка. Спротивставените ставови можат да го збунат и вознемират детето.
Бидете трпеливи и на детето дајте му доволно време да се адаптира.
Многу е важна утринската разделба. Бидете смирени и не ја покажувајте вашата тага и загриженост што го оставате, детето може да го почувствува тоа и да биде вознемирено.
Не брзајте, не заминувајте без поздрав, но и не се задржувајте предолго. Долгото смирување или вашето повторно враќање не се препорачува. Детето ќе плаче повеќе очекувајки дека родителот ќе се врати и ќе го однесе дома.
Постојано охрабрувајте го вашето дете.
Претставете му ја градинката и подгответе го за тоа што тука го очекува.
Првата недела детето носете го во градинка после појадокот – во 09:00 часот, на воспитна активност.
Придржувајте се на договореното време за земање на  вашето детето од градинка.
Периодот на адаптација може да трае од 15 до 30 дена. Во тој период детето останува пократко време во зависност од неговото приспособување и договорот со воспитниот и згрижувачкиот кадар.
Прилагодете го ритамот на живот на детето во семејството со ритамот кој детето го има во градинка.
Во периодот на адаптација не го навикнувајте на нови облици на однесување –одвикнување на пелени, од цуцла,шише…
Поминувајте повеќе време со детето по враќање од градинка – шетајте, играјте, разговарајте.
Учествувајтево осамостојувањето на вашето дете, за јадење, облекување, одржување на хигиена, и сл.

– Можни реакции во периодот на адаптација
Бурни изливи на емоции, плачење,тагување…
Силно протестирање
Да пројави психосоматска реакција
Да одбива комуникација со вработените и децата
Да одбива храна
Да има нарушен сон
Да биде вознемирено и дома
Регресија во однесувањето – нарушување на воспоставената контрола на физиолошки потреби-мокрење во текот на денот, цицање на прст, промени во говор…

– Адаптацијата може да биде:
Лесна
Сите реакции на детето и промените во однесувањето се нормализираат во текот на првите 10 до 15 дена од тргнувањето во градинка.
Умерено тешка
Промените во однесувањето се продолжени, но се стабилизираат во просек од 1 месец или 2 месеци. Детето тешко го прифаќа одвојувањето и доаѓањето во градинка.
Тешка
Долготрајни и силни реакции и промени во однесувањето кои можат да траат и по неколку месеци. Но, овој тип вообичаено се случува кај деца кај кои истовременопостојат повеќе неповолни фактори кои придонесуваат за отежнување и пролонгирање на овој процес.
Доколку имате проблем, прашање, грижи, дилеми, размислување, воочување на конкретна ситуација, состојба, дома или во градинката во однос на вашето дете, Ве молиме контактирајте го раководителот на објектот или лицата од стручната служба.

Тргнување во градинка

Тргнувањето во градинка е важна промена за секое дете, но и за целото негово семејство. Со оглед на тоа дека одењето во градинка не е задолжително, пред се разјаснете си самите на себе дали вашето дете е спремно на оваа голема промена.
– На која возраст детето би требало да оди во градинка?
Другарите, односно друштвото од врсници се потребни уште од најрана возраст.Колку и да се обидуваат родителите во играта со детето да бидат соиграчи, тие секогаш остануваат мама или тато, тие секогаш ќе бидат возрасни личности и затоа не можат да бидат соодветно друштво. Исто така, родителите често се уморни, заситени со своите обврски, па во игрите со детето не го посветуваат целото свое внимание.
Покрај образовната улога која ја има градинката и принципот на стекнување на знаење низ игра и забава, уште една важна улога на градинката е социјализацијата.Се смета дека за детето е неопходно да покрај одредено знаење има и одредени социјални вештини пред да тргнево училиште. Затоа колку порано го запишете во градинка толку повеќе детето ќе има време да научи да споделува, да се расправа, да се смирува, да ги негува своите другарства, конструктивно да разговара. За жал, влијанието на врсниците може да биде и негативено, на пример да научи погрдни зборови, но тоа е составен дел на растењето. Овие се работи кои нема да можете да ги избегнете, а полесно ќе поминете преку нив доколку ваквото однесување на детето почне од порана возраст.
– Како да му ја олесните адаптацијата на детето за градинката?
Вашиот став.
Уверувањето дека секое дете мора да доживее стрес кога поаѓа во градинка е предрасуда. Напротив, почесто родителите се тие кои поминуваат низ „пекол“ отколку нивните деца. Колку и како родителите се спремни да го пуштат детето во градинка, ќе се рефлектира врз нивните деца. Доколку родителот чувствува страв, тој тоа свесно или несвесно го пренесува на детето. Меѓутоа, доколку родителот е смирен и оптимистичен остава впечаток дека се е во ред. Ако успее на детето да му покаже радост дека ќе тргне во првото „училиште“ детето ќе влезе во градинката без големи „драми“.
– Конкретни прашања.
Кога ќе го земете детето од градинка не го напаѓајте веднаш со прашања: „Што правеше, како си помина?“
На тие прашања ќе добиете одговор: „Добро си поминав, не правевме ништо.“. Место таква комуникација изберете колку што можете поконкретни прашања. На пример: „Дали денес игравте со коцки?“, „Со кој другар денес најмногу си играше?“, и сл. Исто така, доколку детето на почетокот одбива да зборува за градинката, дозволете му го тоа.На детето му е потребно време да ги преработи доживувањата и искуствата во текот на денот, како би можело да ги сподели со вас.